നയന്റീസ് കിഡ്‌സിനെ ആവേശ ഭരിതമാക്കിയ സൂപ്പർമൻ പരമ്പര ശക്തിമാൻ വീണ്ടും എത്തുന്നു. ‘അവൻ മടങ്ങിവരുന്നു’ എന്ന അടിക്കുറിപ്പോടെ പരമ്പരയിൽ ശക്തിമാനായി വേഷമിട്ട മുകേഷ് ഖന്ന തന്നെയാണ് ഇക്കാര്യം അറിയിച്ചത്. അദ്ദേഹം ടീസറും പങ്കുവച്ചിട്ടുണ്ട്. ഇന്ത്യയുടെ ആദ്യ സൂപ്പർ ഗുരു – സൂപ്പർ ഹീറോ മടങ്ങിയെത്തുന്നു. തിന്മയേയും ഇരുട്ടിനെയും അകറ്റാനും പുതിയ പാഠങ്ങൾ പറഞ്ഞുനൽകാനും ഗുരു എത്തുന്നു. ഇരുകയ്യും നീട്ടി അവനെ സ്വാഗതം ചെയ്യാം എന്ന് മുകേഷ് ഖന്ന ടീസർ പങ്കുവച്ചുകൊണ്ട് ഇൻസ്റ്റഗ്രാമിൽ കുറിച്ചു.
ഒരുപ്പാട് ബാല്യങ്ങൾക്ക് മറക്കാൻ കഴിയാത്ത സൂപ്പർ ഹീറോ പറമ്പരയായിരുന്നു ശക്തിമാൻ. 1997 സെപ്റ്റംബർ 13-നായിരുന്നു ഈ പരമ്പരയുടെ ആദ്യ എപ്പിസോഡ് സംപ്രേഷണം ചെയ്‌തത്‌. 2005 മാർച്ച് വരെ ഷോയുടെ സംപ്രേഷണം നടന്നിരുന്നു. അതിലെ പ്രധാന കഥാപാത്രമായി വേഷമിട്ട മുകേഷ് ഖന്ന തന്നെയായിരുന്നു നിർമാതാവ്. സീരിസായിട്ടാണോ സിനിമയായിട്ടാണോ ശക്തിമാൻ വീണ്ടുമെത്തുന്നതെന്ന് വ്യക്തമല്ല. നിരവധി പേരാണ് മുകേഷ് ഖന്നയുടെ പോസ്റ്റിന് താഴെ സന്തോഷം പങ്കുവച്ച് എത്തുന്നത്.
80- 90-കളിലെ കുട്ടികൾക്കിടയിൽ താരംഗമായിരുന്ന ശക്തിമാൻ ഇന്നത്തെ തലമുറയിലെ കുട്ടികൾ സ്വീകരിക്കുമോ എന്നാണ് കണ്ടറിയേണ്ടത്. എങ്കിലും ഒരുപാട് മനുഷ്യരെ തങ്ങളുടെ ബാല്യകാലത്തേക്ക് ഈ വാർത്ത കുട്ടികൊണ്ട് പോയിട്ടുണ്ടെന്ന് വ്യക്തമാണ്. തൊണ്ണൂറുകളിലെ കുട്ടികളുടെ പ്രിയപെട്ടതും മറക്കാൻ ആവാത്തതുമായ കഥാപാത്രമായിരുന്നു ശക്തിമാൻ. വീണ്ടും എത്തുമ്പോൾ അവരുടെ ഗൃഹാതുര ഓർമ്മകളാണ് കമന്റുകളായി പങ്കുവക്കുന്നത്.
പഴയ ഓർമകളിലേക്ക് കൂട്ടികൊണ്ട് പോയി, ടു കെ പിള്ളേർ വന്ന് കാണണം, നയൻന്റീസ് കിഡ്സ് ലൈക്ക് അടിക്ക് എന്നെല്ലാമായിരുന്നു കമന്റുകൾ. അന്ന് വലിയ ഹിറ്റ്‌ ആയി മാറിയ ശക്തിമാൻ അതെ സീരിയൽ തന്നെ മലയാളം ഡബ്ബിങ് മാത്രം പുതുതായി ചെയ്ത് അടുത്തിടെ പുറത്തിറക്കിയിരുന്നു. ഇത് മലയാളി പ്രേക്ഷകർ ഏറ്റെടുത്തിരുന്നു. സീരിയലിലെ ആദ്യ എപ്പിസോഡ് മൂന്നുലക്ഷത്തോളം ആളുകളാൾ കണ്ടിരുന്നു. അൾട്രാ മലയാളം എന്ന യൂട്യൂബ് ചാനലിലൂടെയാണ് ശക്തിമാൻ പ്രദർശിപ്പിച്ചത്. Mukesh Khanna Instagram Post